السلام عليكم ورحمة الله وبركاته
----------------------
كان يا ماكان فى سالف العصر والاوان
كان فى فيل صغير قوى بيعيش فى وطنه فرحان
بيقضى يومه وسط عيلته وبين اصحابة كان حاسس بالامان
بس ياخسارة الحال دة ما استمرش كتير ومكنش عارف انه فى يوم من الايام
هتحصلة حاجة تخلية طول عمرة زعلان وقرفان
ياترى ايه اللى حصلة تعالو نعرف مع بعض ياجدعان
اكيد عكر صفو حياته انسان
وانا هحيكلكوا الحكاية من الاول بس عاوز تركيز معايا ومش عاوز حد منكم يمل ولا يكون قلقان
صلوا بينا على النبى
الفيل كان صاحى فى اليوم دا فرحان كالعادة ولكن للاسف كان الصياد فى نفس اليوم محضرلة مكيدة
الفيل فجاءة وهو ماشى لقى نفسة متعرض للاسر وفى فقص حديد فوق سيارة نقل حيوانات مقفول علية ووطنه اللى بيحبة خلاص
معدش هيشوفة تانى لانه راحل عنه للابد
الصياد اخد الفيل وراح لحديقة حيوان فى بلد بعيد عن موطنه وباعه بمبلغ مش بطال
كان صاحب الحديقة مبسوط قوى بقدوم الضيف ماهو مش حاسس باللى فى نفس الفيل الغلبان من الم وحسرة
المهم اللى حصل بعد كدة اية ؟
صاحب الحديقة اخد الفيل وربط رجلة فى سلسله حديد وربطها من الناحية التانية فى قالب حديد ضخم جدا
الفيل كان ناقم على الوضع الجديد
ازاى اكون حر واصبح اسير بدون ذنب وفكر وقال لازم اتحرر وبالفعل حاول اول يوم لكنه تعب مقدرش
وتانى يوم حاول تانى وبرضو مقدرش لكن العزيمه عمرة مارفارقته واستمر الحال اسبوع واستمر شهر
ولكن بدون فايدة واخيرا رضى بالامر الواقع وقال خلاص هى دى حياتى الجديدة
ولازم اعيش كدة
وبعد فترة لاحظ صاحب الحديقة ان الفيل رضى بالامر الواقع وهدى ومعدش بيثور راح مغير القالب الحديد الضخم لقالب خشب بنفس الحجم
وكان الغريب ان الفيل محاولش يثور ويهرب
وبقى زوار الحديقة بيستغربوا ويسألوا صاحب الحديقة ازا ى الفيل الضخم هادى ومش بيهرب مع انة مربوط فى قالب خشب سهل جدا علية جرة
كان صاحب المزرعة بيحكليهم الحكاية بتاع الفيل اللى انا من الصبح بحكى فيها وبيوضحهلم ان الفيل خلاص رضى بالامر الواقع
ودى كانت نهاية الحكاية الفيل
________________________
طبعا كلكم بتقولوا انا قصدى اية بالحكاية دى
اوضح لكم
انا قصدت بالحكاية الشباب
ايوة الشباب بتاعنا اللى رضى بالامر الواقع يقعد طول عمرة يتعلم ويدخل الجامعه اى كلية من الكليات واهى ايام بيقضيها لانه راضى بالامر الواقع
وحاطط فى دماغه انه هيطلع مش هيلاقى شغل فخلاص بقى بلا دراسة بلا وجع دماغ
انا اقضى الاربع سنين بتوع الكلية اعرف بنات واجرب السجاير ومافيش مانع اجرب المخدرات
واية يعنى اما اقعدلى كمان سنتين مالحال هو نفسة الحال هتخرج ومش شغال
وبعد مايتخرج يلاقى الحاجة الوحيدة اللى هو اتعلمها اللى هى الانحراف
ويبتدى بقى يدور على دعم الموهبة قصدى الوكسة والخيبة اللى هو بقى مبدع فيها
وطبعا كلنا عارفين ان المجال دا متوفر جدااااااا
بقت اكتر حاجة متوفرة القهاوى واماكن اللهو وتضييع المال والصحه ومعصية الله ولاحول ولاقوة الا بالله
الشباب اصبح متواكل ونسى الاخذ بالاسباب
قال تعالى
{ وَقُلِ اعْمَلُوا فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُون }
وقال رسول الله صلى الله علية وسلم
« اغتنم خمسا قبل خمس: شبابك قبل هرمك، وصحتك قبل سقمك، وغناك قبل
فقرك، وفراغك قبل شغلك، وحياتك قبل موتك »
خلى بالك انت مسؤل قدام ربنا على كل اللى انت بتعمله
قال رسول الله صلى الله علية وسلم
<<لاتزول قدم عبد يوم القيامه حتى يسأل عن اربع ومن الاربع وعن شبابة فيما ابلاة وعن عمرة فيما ابلاة وعن ماله من اين اكتسبة وفيما انفقة >>
هتقول اية لربنا ؟
الشباب يعمل المعصية ويفاخر بها ونسى تماما
قول النبى صلى الله علية وسلم
{ كل أمتي معافى إلا المجاهرين، وإن من الإجهار أن يعمل العبد بالليل عملا، ثم يصبح قد ستره ربه، فيقول: يا فلان! قد عملت البارحة كذا وكذا، وقد بات يستره ربه، ويصبح يكشف ستر الله عنه } [متفق عليه].
******************
فى الاخر بقى تعالوا نتعرف على ابطال القصة
يجسد دور الفيل الشباب
يجسد دور الصياد العجز والكسل
يجسد دور صاحب الحديقة الاستسلام لليأس
تأليف واخراج
الشيطان
المتفرجون : اهل الغى والضلال
كتبها لكم
أحمد خلف عباس
السبت مايو 08, 2010 11:10 pm